Click here for Malayalam Fonts

2017, മേയ് 1, തിങ്കളാഴ്‌ച

മുറിയിലെ കാട്ടുതീ

വിദൂരമായാണാ തീന്നാളം
അതെ കാട്ടുതീ തന്നെ. 
കാറ്റിപ്പോഴും തണുത്തിട്ടാണ്. 
തീമണക്കുന്നത് എനിക്ക് മാത്രമാണോ.. 
പെട്ടെന്ന് ചുറ്റും കത്തുന്നു, ചിതലും പുസ്തകങ്ങളും 
മണ്മറഞ്ഞ ഗുരു തന്ന ബാംസുരിയും.
ഒച്ചവച്ചയല്‍ക്കാരെ ഉണര്‍ത്തെണ്ടല്ലോ.
തീപിടിച്ച കാലത്തുണ്ടാവുമൊ ബ്രഹത്തെ
തീയെപ്പറ്റിയുള്ള കവിതയും സംഗീതവും?
ചുവരിലിരിക്കുന്ന സിസ്റ്റീന്‍ ചാപ്പൽ
ആദ സൃഷ്ടിയുടെ ചിത്രത്തിന്റെ
വലതു പുറമാകെ കത്തുന്നു.
ചാരമാവാന്‍ കൂട്ടാക്കാതെ നിര്‍ത്താതെ...
അങ്ങനെ മഹാ നഗര മധ്യത്തില്‍
പട്ടാ പാതിരക്ക്,
ബഹുനിലക്കെട്ടിടത്തില്‍ ബാക്കിയെവിടെയും
പോറലേല്‍ക്കാതെ
ഒരുമുറി എരിഞ്ഞടങ്ങി.